بە گوتاری یەکگرتوویی و ئاشتیی نەتەوەیی و هەوڵدان بۆ یەکخستن و یەکڕیزیی ناوماڵی کورد ، ناوەندی کوردیسم ، بەرەو دامەزراندنی حکوومەتی کاتیی کوردستانی ڕۆژهەڵات لە تاراوگە و دوورخراوەیی دا، هەنگاو داوێ.
بە بێ دەمارگرزیی حیزبایەتی و بە بێ وەبەر چاو گرتنی بیرو باوەڕ و ئایین و ئیدێئۆلۆزی و تەنیا لە ژێر ناوی نەتەوەی کورد، پێویستیمان بە هاودەنگی و پاڵپشتی و یەکگرتوویی هەیە .
ئامانجی سەرەکی و گشتیمان وەدەرنانی داگیرکەری ئێرانییە لە خاکی پیرۆزی کوردستان.
هەموومان پێکەوە بە هەموو ڕەنگ و جیاوازییە سیاسی و فکرییەکانەوە هەنگاو بەرەو دامەزراندنی حکوومەتی کاتیی کوردستان لە تاراوگە داوێین و پێکەوە کار بۆ سەقامگیریی ئاشتی و دێموکراسی و دروستکردنی کوردستانێکی ئازاد و سەربەخۆ و ئاوەدان دەکەین.
یاسا و مەرجەکانی بەشداری کردن لە هەڵبژاردنی شووڕای پێکهێنانی حکوومەتی دوورخراوەی کوردستانی ڕۆژهەڵات لە تاراوگە
لە ڕێگەی ماڵپەڕی کوردیسم، بە مەبەستی دامەزراندنی حکوومەتی جێگرەوە و لە دوورخراوەیی و تاراوگە دا ئێوە دەتوانن پاش خوێندنەوەی یاسا و مەرجەکانی بەشداریکردن لەو هەڵبژاردنە دا دەنگ بە بەربژێر و کاندید و کەسی جێگەی باوەڕ و متمانەی خۆتان بدەن.
هەڵبژاردنەکە تەنیا لە سایت و ماڵپەڕی کوردیسم بەڕێوە دەچێ.
لە بەشی لیستی کاندید و بەربژێرەکان دەتوانن ناو و ژمارەی سەرجەم بەربژێرەکان ببینن.
هەر کەسەی دەتوانێ لە یەک تا ٥٠ کەس هەڵبژێرێ و دەنگی پێ بدا.
دوای هەڵبژاردنی ناوەکان ، پێویستە دوگمەی پەسەند کردن لێ بدەن.
لە هەر کامپیوتێرێکەوە تەنیا یەک جار دەتوانن دەنگ بدەن.
ئەنجامەکان دەتوانن بە شێوەی زیندوو و ڕاستەوخۆ ببینن.
مەرجەکان بۆ بەربژێر بوون:
– هەموو کوردێکی ڕۆژهەڵاتی لە هەر شوێنێکی ئەو جیهانە بێ، مافی ئەوەی هەیە کە ناوی خۆی وەک بەربژێر و کاندید تۆمار بکا.
– پێویستە فۆڕمەکە بە دروستی پڕ بکڕێتەوە، چونکە ئەو فۆڕمانەی بە هەڵە یا ناتەواو پڕ دەکرێنەوە ناخرێنە لیستی بەشداربوانەوە.
پڕۆسەی دەنگدان و هەڵبژاردن لە ماڵپەڕی کوردیسم بەو چەشنەیە کە ئەگەر کەس یان کەسانێک بە مەبەستی تەقەلوب و تەزویر کردن و زیاد کردنی دەنگ بۆ کاندید و بەربژێرەکانیان کەڵک لە ئای پی ساختە و جەعلی وەربگرن و بیانهەوێ لە جارێک زیاتر دەنگ بدەن، ئەوە سیستمی خۆکاری بەشی دەنگدان ، هاوکات لە گەڵ نوێبوونەوەی ڕۆژانەی سەرجەم ئەو دەنگانە حەزف دەکا کە بەشیوەی ساختە و تەقەلوب و لە ڕێگەی ئای پی جەعلیەوە دراون .
ئاگادارتان دەکەینەوە کە ماڵپەڕ ئای پی هەموو ئەو کەسانەی کە دەنگ دەدەن لە ناو خۆیدا سێیف دەکا و هەموو ئەوانەش کە سیستمی ئەمنیی سایت وەک جەعلی و دروستکراو دەیانناسێ حەزف دەکا .
بۆیە داواکارین دەنگدەر و بەربژێرەکان خۆیان لە جەعلکردن بپارێزن ، چونکە ئامانج بەڕێوەبردن و بەڕێوە چوونی هەڵبژاردنێکی سالم و بێ فێڵ و گرێ و گۆڵە .
لە داهاتوو دا سەرجەم ئەو ئای پییە جەعلیانە بۆ ئەوەی ڕای گشتی لێێ ئاگادار بێ بڵاو دەکەینەوە و بە بەڵگەوە نیشان دەدەین کە چ کەس یان کەسانێک لە هەوڵی زیادکردنی دەنگەکانیان دا بوون لە ڕێگەی تەزویر و جەعلەوە .
لە کۆتاییدا دەستەی بەڕێوەبەری و هەڵبژاردنی ناوەندی کوردیسم، ئەو کاندید و بەربژێرانە لە قۆناغی دووهەم دا حەزف دەکا کە درێژە بە کاری جەعل و تەقەلوب بدەن و ڕای گشتیی کوردستانی لێ ئاگادار دەکەینەوە .
هەروەها بە ئاگاداریی گشت هاونیشتمانان دەگەیەنین کە:
پڕۆسەی دەنگدان بۆ بەربژێر و کاندیکراوەکانی شورای پێکهێنانی حکوومەتێكی کاتی و دیفاكتۆ بۆ کوردستانی ڕۆژهەڵات لە دەرەوەی وڵات لە ڕۆژی ٩ی مانگی جۆزەردانی ١٣٩٩ی هەتاوی (( ١٣٩٩/٠٣/٠٩)) ڕا دەستی پێکردووە.
پڕۆسەکە بریتی دەبێ لە دوو قۆناغی سەرەکی:
- قۆناغی هەڵبژاردن
- قۆناغی دوای هەڵبژاردن
لە قۆناغی یەکەم دا دوو خولی هەڵبژاردن بەڕیوە دەچێ:
خولی یەکەم: لەو خولە دا کەس یان کەسانێک خۆیان بەربژێر دەکەن و لە لایەن خەڵکەوە دەنگیان پێدەدرێ و تا ڕۆژی
٢ی سەرماوەزی ١٤٠٠ی هەتاوی خەڵک و چالاکانی کوردستانی ڕۆژهەڵات لە دەرەوە و ناوخۆ دەتوانن خۆیان بۆ بەشداری کردن وەک کاندید و بەربژێر ناونووس بکەن . ئەم خولە تا ڕۆژی ٢ی ڕێبەندانی ١٤٠٠ی هەتاوی درێژەی دەبێ و بەو شێوەیە خولی یەکەم کۆتایی پێدێ.
ئەوانەی لە خولی یەکەمدا توانیوایانە دەنگی یەکەم تا ٩٩ بەدەست بێنن، دەچنە خولی دووهەمی هەڵبژاردنەکەوە.
خولی دووهەم: هەڵبژاردن و دەنگدان لە نێوان کەسانی یەکەم یا نەودونۆیەم دا دەکرێ و لە ئەنجامدا ٦٩ کەس دەنگیان پێدەدرێ و دەچنە قۆناغی کۆتایی و گرتنی کۆنگرە.
لە ڕۆژی ٣ی ڕێبەندانی ١٤٠٠ی هەتاوی را تا ڕۆژی ١ی خاکەلێوەی ١٤٠١ی هەتاوی دەنگدان بۆ خولی دووهەم بەڕێوە دەچێ.
پاش کۆتایی خولی دووهەم دەچینە قۆناغی دوای هەڵبژاردن و کۆبوونەوە بۆ ڕێکخستنی کۆنگرە دەست پێدەکا.
کۆنگرە واتە پارلەمان لە تاراوگە ئەركی ساغكردنەوەی كابینەی حکوومەتی دیفاكتۆی بۆ کوردستانی ڕۆژهەڵات لە ئەستۆ دەبێ، بۆیە:
پاش ڕاوێژ و راوێژكاری لە گەڵ بەربژێرە سەرکەوتووەکان، دەستەی بەڕێوەبەریی ناوەندی کوردیسم لە مانگی ڕەزبەری ١٤٠١ ی هەتاوی لە یەکێک لە وڵاتانی ئورووپایی کۆنگرە دەگرێ و لەوێدا لە فەزایەکی دێموکراتیک دا و بە بەشداریی هەموو ئەندامانی سەرکەوتوو، لە ڕێگەی هەڵبژاردنەوە پۆست و بەرپرسیارەتی وەزارەتەكانی كابینەكە دیاری دەکرێن و حکوومەتی دیفاكتۆی تەوافوقی، ئینتقالی بۆ کوردستانی ڕۆژهەڵات لە تاراوگە و دوورخراوەیی دا ڕادەگەیەندرێ و دەست بە چالاکییەکانی لە ئاستی نێودەوڵەتیدا دەکا و لە ئاستی ناوخۆییش هەوڵ بۆ تەبایی و یەکڕیزیی و مودیریەتی خەباتی ناوخۆی وەلات دەدا، و چەخماخەی پڕۆژەی ئاشتی نەتەوەیی ڕۆژهەڵات لێدەدرێ.
ئەرکەکانی حکوومەتی کاتیی کوردستانی ڕۆژهەڵات ، بەكەڵكوەرگرتنی لە پێكهاتەكانی وەك پارلمان و وەزارەتەکان بەشێکی بریتی دەبێ لە:
حكومەتی کاتی وەك مەرجەعێكی نەتەوەیی خاوەن بریار لە گۆرەپانی شەڕ و ئاشتی روو لە یار و نەیار دا، ئەركی ناوەندێكی خاوەن بریاری نەتەوەیی بەجێدەگەیەنێت.
بەشیک لە ئەرکەکان:
هەوڵدان بۆ لابیگەری و دۆزینەوەی دۆست و هاوپەیمانی دەرەکی بۆ پرسی کورد لە ڕۆژهەڵات،
هەوڵدان بۆ یەکخستن و یەکڕیزیی ناو ماڵی کورد .
دروستکردنی هێزێکی هاوبەشی پێشمەرگەی کوردستان لە ژێر ناوی هێزی پێشمەرگە یا سوپای میللی کوردستان یا هەر ناوێکی پەسەند کراو لە لایەن حکوومەتی کاتیەوە.
دروستکردنێکی ئادرەسێکی بە هێز بۆ هەموو ئەو وڵات و هێزانەی دەخوازن یارمەتی یا تەعامول لە گەڵ پرسی کورد لە ڕۆژهەڵات بکەن.
لە کۆتاییدا پرسیاری زۆرمان ڕووبەڕوو کراوەتەوە کە لە بەر چ هۆکارێک بەڕێوەبەرانی ئەو پڕۆژەیە بە نهێنی کار دەکەن و خۆیان ئاشکرا ناکەن.
وەڵام:
ئەزموونی دەیان ساڵەی خەباتی گەلی کورد لە کوردستانی ڕۆژهەڵات ئەو ڕاستییەی بۆ سەلماندووین کە ئەگەر لایەنێک بە ئاشکرا پڕۆژەیەکی دابێ، ئەوە لە لایەن لایەنەکانی دیکەوە وەڵامی ئیجابی وەرنەگرووە و هیچ کام لە هێزەکان ئامادە نەبوون، بچنە ناو پڕۆژەیەک کە هێزێکی کوردستانی بە تەنیا پێشنیاری داوە.
بە داخەوە تا ئێستاش بۆ کاری هاوبەش و بە کۆمەڵ و جەمعی ڕانەهاتووین و بەرانبەر بە یەکتر ،ئەوەندە دژ کردەوەمان هەیە کە بەرانبەر بە دوژمن زۆر جار نەرم و نیانتر بووین.
زۆر جار ئەگەر لایەنێک پڕۆژەیەکی ڕێک و پێک و شیاویشی دابێ، دیتوومانە کە لایەنەکانی دیکە پشتگوێیان خستووە.
ئەرکێکی لەو چەشنە ، پێویستی بە کەسانێکە کە بۆ سەرخستنی گەلی کورد لە ڕۆژهەڵات دەبێ خۆبەخشانە و وەک سەربازی ون چالاکی بکەن و هەوڵی جیددی بدەن بۆ کۆکردنەوەی هێز و کەسایەتییە سیاسیەکان لە دەوری یەک مێز و یەک ژووری هاوبەش کە تەنیا بەرژەوەندییەکانی کوردستانی ڕۆژهەڵاتی تێدا کۆ بکرێتەوە و کاری بۆ بکرێ.
ئێمە وەک ڕێکخراوی کوردیسم، وێڕای ڕێز و خۆشەویستی و ئەمەگناسی بەرانبەر بە خەبات و قوربانیی هەموو هێز و حیزب و لایەنەکان، وەک لایەنێکی سەربەخۆ و بە دوور لە دەمارگرژیی حیزبایەتی هەنگاو بۆ کۆبوونەوە لە دەوری یەک داوێێن .
داوامان لە هەموو خەڵکی کوردستان، بە هەموو چین و توێژەکانیەوە ئەوەیە کە بۆ گەیشتن بە ئامانج و ڕزگاریی نەتەوەیی پاڵپشت و هاوکار و یاریدەدەرمان بن .
